O emprendemento no rural: necesidade e oportunidade
Emprender no rural é, a día de hoxe, unha necesidade e unha oportunidade a partes iguais, e querémosvos contar por que.
Hai uns meses falabamos sobre o despoboamento do rural, sobre todo do rural galego. Unha das solucións que propoñiamos era fomentar o emprendemento no rural e hoxe queremos profundar neste tema que tan interesante e necesario parécenos.
Paso de Vaca, unha iniciativa de compromiso co rural
Paso de Vaca naceu como unha iniciativa reivindicativa do rural que buscaba informar e divulgar sobre o papel que este ten para Galicia. Entender a súa importancia para a comunidade era o paso previo para valoralo como se merecía.
Co tempo, a iniciativa foi transformándose, gañando forza, pero, sobre todo, adquirindo unha perspectiva moito máis ampla. Xa non só buscaba reivindicar o papel do rural galego, Paso de Vaca empezou a buscar solucións ao problema. Así naceu Dá o Paso, unha iniciativa que quería achegar formación sobre o emprendemento e a experiencia de casos reais de emprendedores de éxito.
Desde Casa Grande de Xanceda e, en especial o proxecto de Paso de Vaca, sempre que podemos buscamos e apoiamos iniciativas de emprendemento no rural. Pronto fará un ano da conferencia “A muller eco-emprendedora no medio rural, cal é o seu papel?”, unha charla na que se falou de emprendemento e da muller pero, sobre todo, do importante que é conseguir que todos eses proxectos, cheos de gañas e ilusión, vexan o rural como o seu ecosistema natural para crecer.
A necesidade de emprender no rural
Resulta innegable a necesidade de emprender no rural como solución para frear o despoboamento deste. É importante entender tamén que, non só fai falta que emprendedores e emprendedoras trasladen ao rural os seus proxectos e lévenos a cabo alí, se non que os mozos queiran que os seus proxectos nazan, crezan e se desenvolvan no rural. Que o rural sexa unha parte indispensable dos proxectos, que todo estea vinculado.
Compartimos aquí unha plataforma chamada Ruraltivity que recolle experiencias reais sobre como é emprender no rural. Coñecer a experiencia doutras persoas axuda a detectar cales son os puntos nos que máis atención hai que prestar, erros típicos, consellos e trucos…
A oportunidade de emprender no rural
A oportunidade hai que buscala, non basta con confiar en que aparecerá. Emprender no rural é unha oportunidade por moitos motivos:
- Economicamente existen moitas axudas para aquelas persoas que queiran desenvolver os seus proxectos no rural.
- O rural é o mellor dos escenarios para comezar un proxecto centrado na ecoloxía e a sustentabilidade, dous conceptos que cada día están máis en auxe e que, co paso do tempo, converteranse na nosa forma de vida.
- O grao de competitividade é menor e a oferta tamén, polo que facerse un oco no mercado resulta moito máis fácil e rápido que nun contexto máis saturado.
Estes son algúns exemplos, pero convidámosche a que contactes con emprendedores no rural para que che conten a súa propia experiencia. Animámosvos a deixar un comentario, tanto se sodes emprendedores e queredes compartir a vosa experiencia, coma se sodes futuros emprendedores queredes coñecer casos reais ou compartir as vosas inquietudes.
