Santiago: a primeira cidade con Paso de Vaca permanente
O 25 de xullo, Día de Galicia, Casa Grande de Xanceda, en colaboración co Concello de Santiago, inaugurou na rúa peonil de Praza Roxa o primeiro Paso de Vaca permanente nunha cidade. Fíxoo baixo o lema “Galicia, terra de vacas”, polo Día de Galicia e para reivindicar a importancia do rural e das nosas vacas frisonas.
Trala inauguración con membros da corporación municipal e as socias de Casa Grande de Xanceda, a iniciativa Paso de Vaca celebrou o Día de Galicia cunha carpa chea de actividades e degustacións. Toda a xente que se pasou polo stand elaborou un mural colectivo sobre que é o rural que se exporá en Casa Grande de Xanceda.
Ademais, para ligar a iniciativa co Xacobeo, os peregrinos puideron finalizar a súa Compostela cun selo único de Paso de Vaca.
Que outros pasos podes cruzar?
Hai varios concellos rurais que destacan pola súa produción leiteira nos que xa hai un Paso de Vaca. Podes visitalos en:
- Paso de Vaca en Mazaricos
- Paso de Vaca en A Baña
- Paso de Vaca en Santa Comba
- Paso de Vaca en Arzúa
- Paso de Vaca en Mesía, ven á nosa granxa a cruzalo!
Que ver en Santiago?
Se te animas a cruzar o noso Paso de Vaca na Praza Roxa, podes aproveitar para facer unha visita por Santiago, a capital galega. Desde o noso paso, subindo, atoparás a Alameda compostelá co seu emblemático Parque da Ferradura, onde encontrarás a estatua-homenaxe a Rosalía de Castro. Desde a Alameda, camiñando cara a zona vella, gozarás dunha das mellores vistas da Catedral. Antes de cruzar o semáforo de Porta Faxeira chegarás á estatua das Marías, outro símbolo de Santiago.
A Alameda era o espazo do antigo mercado de gando de Compostela, por iso o Paso de Vaca está ubicado preto. Na zona norte de Santiago aínda quedan granxas e o noso símbolo tamén é un recoñecemento para eses gandeiros.
O mellor que podes facer na zona vella é internarte polas súas rúas de pedra e parar nos negocios locais, todos eles con gamas de produtos artesáns e de deseñadores galegos. Tamén atoparás marabillosos restaurantes para xantar con produtos frescos que fusionan a cociña tradicional e a innovación. E non esquezas sacar unha foto nas súas prazas: O Toural, Cervantes e Praterías. Desde esta última podes acceder ao Obradoiro e á Quintana, os amplos espazos aos lados da Catedral.
